ބައި މެރަތަނެއް ނޫނީ ހާފް މެރަތަން ފާހަގަކުރެވެނީ އެންމެ އެކަށީގެންވާ ރޭސް ދުރުމިނެއްގެ ގޮތުގައެވެ. އެއީ ފަސޭހަކަމާއި ގޮންޖެހުން ހަމަހަމަވާވަރުގެ ދިގު މިނެކެވެ. އާރްއާރްސީއޭ ސެޓިފައިޑް ރަނިންގ ކޯޗް އަދި ރީރޫޓެޑް ރަނިންގގެ ބާނީ ކާރާ ޑަޑްލީ މި ދުރުމިން ސިފަކުރަނީ ގިނަ ދުވުންތެރިންނަށް ހާސިލުކުރެވޭނެ ލަނޑުދަނޑިއެއްގެ ގޮތުގައެވެ. އަލަށް ފަށާ މީހުންނަށް ޑަޑްލީ ހުށަހަޅަނީ 16 ހަފްތާގެ ތަމްރީނު ތައްޔާރީއެކެވެ. މީގެ ތެރޭގައި ހިމެނެނީ ފަށައިގަތުމަށްޓަކައި 4 ހަފްތާގެ މުއްދަތަކަށް ގަވާއިދުން ދުވުމެވެ.
ބައި މެރަތަން ކާމިޔާބުކުރުމަށް މުހިންމު ކަންތައްތައް.
1. ސާފު ލަނޑުދަނޑިއެއް ކަނޑައެޅުން:
ކަނޑައަޅާ މަޤްޞަދު ސާފުކޮށް އެގުން - އެއީ ރޭސް ނިންމުންތޯ ނުވަތަ ވަކި ވަގުތެއް ހާސިލުކުރުންތޯ؟ ލަނޑުދަޑި ކަނޑަ އެޅުމުން ތަމްރީނު ޕްލޭން އެކުލަވާލުމަށް އެހީތެރިވެދެއެވެ. އަލަށް ފަށާ މީހުންނަށް މަޢުލޫމާތު އެއްކޮށް ތަމްރީނު ރާވައިދޭނެ ކޯޗެއް ހޯދުމުން ފައިދާ ކުރާނެއެވެ. ކޯޗެއްގެ އެހީތެރިކަން ބެނުންނަމަ މި އެބްސައިޓިގައި އަޅުގަނޑުމެން ބައެއް ދުވާ ގުރޫޕުތަކާއި ކޯޗުންގެ މައުލޫމާތު ހުންނަ ސަފްހާއެއް އޮންނާނެއެވެ.
2. ދުވުމުގެ އަސާސެއް ބިނާކުރުން:
ހަފްތާއަކު 15-25 ކިލޯ މިޓަރު ދުވުމަކީ ރަނގަޅު ފެށުމެކެވެ. އަލަށް ފަށާ މީހުން އަނިޔާވުމުން ސަލާމަތްވުމަށްޓަކައި ދިގު ދުރުމިންތަކަށް ދުވުމުގެ ކުރިން ގަވާއިދުން ދުވުމަށް އަހައްމިއްޔަތުކަން ދޭންވާނެއެވެ.
3. 15 ކިލޯ މީޓަރު ދުވުމެއް ފުރިހަމަކުރުން:
ތަމްރީނު ޕްލޭންތަކުގައި އާންމުކޮށް ހިމެނެނީ މަދުވެގެން އެއްފަހަރު 16 ކިލޯ މީޓަރ ދިގު ދުވުމެކެވެ. މި ދުރުމިން ފުރިހަމަކުރުމުން ދިމާވެދާނެ މައްސަލަތައް ފާހަގަކުރެވޭނެއެވެ. މިސާލަކަށް ވަރުބަލިވުން ނުވަތަ ގުނަވަންތަކުގައި ރިހުން ފަދަ ކަންކަމެވެ. މިކަމުން ބާރު އިތުރުކުރުމުގެ ތަމްރީނާއި އަރާމުކުރުމަށް ބަދަލުގެނައުމުގެ ފުރުޞަތު ލިބެއެވެ.
4. ބާރު އިތުރުކުރުމުގެ ތަމްރީނު ހިމެނުން:
ބާރު އިތުރުކުރުމުގެ ތަމްރީނަކީ އަނިޔާވުމުން ސަލާމަތްވުމަށް ކޮންމެހެން ބޭނުންވާ ކަމެކެވެ. ބަރު އުފުލުމާއި، މޮބިލިޓީ ނުވަތަ ޔޯގާ ހިމެނޭ ރޫޓީނެއް ތަމްރީނު ޕްލޭނުގައި ހިމަނަންވާނެއެވެ. އެންމެ ރަނގަޅީ ތަމްރީނު ފެށުމުގެ ކުރިންނެވެ.
5. ތަމްރީނު ފުރިހަމަކުރުން ވަރަށް މުހިންމު:
ޓްރެއިނިންގގައި ގަވާއިދުން ބައިވެރިވުމަކީ އެއްވެސް ގޮތަކަށް ދޫކޮށްލެވޭނެ ކަމެއް ނޫނެވެ. ރޭވިފައިވާ ޕްލޭންގެ 90-95% ފުރިހަމަކުރުމުން ރޭސް ދުވަހަށް ތައްޔާރުވެވޭނެއެވެ. ޓްރެއިނިންގ ވަގުތު ދުވުންތެރިޔާގެ ޝެޑިއުލަށް ފެތޭގޮތަށް ބަދަލުކުރެވިދާނެއެވެ. ނަމަވެސް އެއްގޮތްކަން ދެމެހެއްޓުން މުހިންމެވެ.
6. ކެއުމަށް އިސްކަންދޭށެވެ:
ދިގު ދުވުމުގައި ކެއުމަކީ ވަރަށް މުހިންމު ދައުރެއް އަދާކުރާ ކަމެކެވެ. ޓްރެއިނިންގ ތެރޭގައި އެކި ބާވަތުގެ ޖެލްތަކާއި، ބުއިންތަކާއި، ފެންހަމަކުރުމުގެ އިސްތިރާޖު ތަޖުރިބާކޮށް، ދުވުންތެރިޔާގެ ހަށިގަނޑަށް އެންމެ ރަނގަޅުގޮތް ދެނެގަންނާށެވެ. މިގޮތަށް ތަޖުރިބާކުރުމުން ރޭސް ދުވަހު ދިމާވެދާނެ މައްސަލަތައް މަދުކުރެވޭނެއެވެ.
7. ކުރު ރޭހެއް ފުރަތަމަ ދުވާށެވެ:
މިއީ ކޮންމެހެން ކުރަންޖެހޭ ކަމެއް ނޫނެވެ. ނަމަވެސް 5 ކިލޯމީޓަރު، 10 ކިލޯމީޓަރު ނުވަތަ 15 ކިލޯމީޓަރު ރޭހެއް ދުވެލުމުން ޔަޤީންކަން އިތުރުވެ، ރޭސް ދުވަހުގެ ކަންތައްތަކާ ބެހޭ މުހިންމު ތަޖުރިބާ ލިބޭނެއެވެ. މީގެ ތެރޭގައި ރޭހުގެ ކުރިން އުފެދޭ ހިތް ނުތަނަވަސްކަމާއި ދުވާ ޕޭސް ބެހެއްޓުން ފަދަ ކަންކަން ހިމެނެއެވެ.
8. މަޤްޞަދަށް އަޒުމް ކަނޑައަޅާށެވެ:
ފޯރި ވަރަށް މުހިންމެވެ. ބައި މެރަތަން ދުވުމަށް އަމިއްލަ ނަފްސަށް އިންވެސްޓްކޮށް، ކެތްތެރިކަން ގެންގުޅެން ޖެހެއެވެ. ޚާއްޞަކޮށް ޓްރެއިނިންގ އުނދަގޫވާ ވަގުތުތަކުގައެވެ. މަޤްޞަދު ހާސިލުކުރުމުގެ ތެދު ނިޔަތް އޮތުމުން އުނދަގޫ ދުވަސްތަކުގައިވެސް ކުރިއަށް ދެވޭނެއެވެ.
ހާފް މެރަތަނަކީ ފުރަތަމަ ފަހަރު ދުވެލުމަށް އުދަގޫވިޔަސް، ހަމަ އެހާމެ އުފާވެރި ކަން ލިބޭނެ ދިގު ރާސްތާ ދުވުމެކެވެ. ރަނގަޅު ބިންގަލެއް އެޅުމާއި، ގަވާއިދުން ދުވުމާއި، ބާރު އިތުރުކުރުމުގެ ތަމްރީނުތައް ހިމެނުމާއި، ކެއުމުގެ ކަންތައް ރަނގަޅުކުރުމާއި، ސާފު އަޒުމެއް ގެންގުޅުމުން ދުވުންތެރިޔާއަށް ރަނގަޅަށް ތައްޔާރުވެ، އޭގެ މަޖަލާ، ހިތްހަމަޖެހުމާއި އުފާވެރިކަން ލިބިގަނެވޭނެއެވެ.
އަޅުގަނޑުމެން ކުރިމަތީ މިހާރުވެސް ޓީއެފްޖީ ލޯންގްރަން އެބައޮތެވެ. މިރޭސް އޮތީ 6 ޑިސެމްބަރގައެވެ. އަންނަ އަހަރު ފެބްރުއަރީ މަހު އެމްއެންޔޫ މެރަތަން އެބަތޮވެ. ރެގިސްޓޭޝަންއަށް އޮތީ ހުޅުވާލެވިފައެވެ. ރޭހަށް ތައްޔާރުވުމަށް ވަޤުތު އެބައޮތެވެ.